पौष ११, काठमाण्डौ । गीतकार तथा साहित्यकार रत्नशमशेर थापालाई भूपी शेरचनको ८१औँ जन्मजयन्तीको अवसरमा पोखरामा थकाली सेवा समितिले भूपी काव्य पुरस्कार प्रदान गर्ने भएको छ । नेपाली गीत तथा साहित्यमा पु¥याएको योगदानको कदर गर्दै कवि भूपीका मित्रसमेत रहेका थापालाई पुरस्कारबाट सम्मान गर्न लागिएको प्रतिभा चयन समिति सदस्य तीर्थ श्रेष्ठले जानकारी दिए ।

सम्मानित हुन लागेका गीतकार थापा १९९४ सालमा काठमाडौंको कमलपोखरीमा जन्मिएका हुन् । थापाले १० को दशकमै मुक्तक लेखेका छन् । थुप्रै पुरस्कार तथा सम्मान पाएका थापाका २ गीतिसंग्रह र २ कविता संग्रह प्रकाशित छन् । पुरस्कारको राशी ५० हजार १ रूपैयाँ रहेको छ । पुरस्कारका लागि भूपीकी जेठी श्रीमति ओमकुमारी र कान्छी श्रीमति कान्तिद्वारा अक्षयकोष स्थापना गरिएको छ । थकाली सेवा समिति अध्यक्ष विश्वमोहन गौचन संयोजक, सचिव गोविन्द तुलाचन, श्रीमति ओमकुमारी, साहित्यकार तीर्थ श्रेष्ठ र सरुभक्त सदस्य रहेको प्रतिभा चयन समितिले थापालाई पुरस्कार दिने निर्णय गरेको हो ।ratna-shamsher-thapa

‘गीतकार थापाको कवि भूपिसँग मित्रवत व्यवहार थियो । रत्नशमशेरका गीत गाएर यात्रा थालेका नारायण गोपाल र भूपीको सम्बन्ध नजिक थियो,’ चयन समिति सदस्य श्रेष्ठले भने, ‘थापालाई पुरस्कार प्रदान गर्दा भूपीप्रति सच्चा सम्मान हुनेछ ।’

यसअघि भूपी स्मृति सम्मानका रूपमा प्रदान गरिने पुरस्कारलाई नियमावली निर्माण गर्दै रकम समेत बढाएर पुरस्कारलाई फराकिलो बनाइएको हो । स्मृति सम्मानबाट कवि सरस्वती प्रतीक्षा र मोमिला पुरस्कृत भएका थिए । भूपीको स्मृतिमा थकाली सेवा समितिले पोखरामा पछिल्लो समय बर्सेनि कवि गोष्ठी, २ वर्षको अन्तरमा पुरस्कार प्रदान गर्न थालेको थियो ।

थकाली सेवा समितिसँगै पोखरेली युवा सांस्कृतिक परिवारले पनि कवि भूपीको सम्मानमा कवि गोष्ठी गर्ने गरेको थियो । यस पटक समितिले मात्र गर्ने कवि गोष्ठीमा पोखराका दर्जन कविले कविता वाचन गर्नुका साथै भूपीको चर्चा हुने आयोजकले जानकारी दिएको छ । १९९२ मा जन्मेका भूपीको निधन २०४६ सालमा भएको थियो । भूपीका ‘परिवर्तन’ नाटक संग्रह, ‘नयाँ झ्याउरे’ कविता संग्रह, निर्झर कविता संग्रह र ‘घुम्ने मेचमाथि अन्धो मान्छे’ कविता संग्रह प्रकाशित छन् ।

Leave a Reply

Your email address will not be published. Required fields are marked *