गीतकार सुवासचन्द्र ढुंगेलले कान्तिपुर टेलिभिजनलाई इङ्गित गर्दै भने ‘त्यहाँ गीत बजिहाल्यो भने भुषण दाहाल निर्देशन गरिएका गीत मात्र बज्ने गर्छ ।’ उनले पछिल्लो समय जुन टेलिभिजनमा काम गर्ने निर्देशक छ त्यही टेलिभिजनमा मात्र गीत बज्ने वा रेडियो पनि आफ्नो पकडको मात्र हुनुपर्ने भएको हुँदा असली गीतहरु पर्दापछाडि परेको आरोप लगाए । मिडियाहरुकै कारण हामीजस्ता गीतकारले एल्बम निकालियो भने ओझेलमा पर्छ, जसले पैसा खर्च गर्छ वा मिडियाकर्मीलाई नै काम दिन्छ त्यसको गीत मात्र चर्चामा आउने गर्छ, गीतकार ढुंगेलको भनाइ थियो ।

गीतकार प्रकाशचन्द्र घिमिरेको गीतिसंग्रह विविधता सार्वजनिक कार्यक्रमको प्रमुख अतिथिसमेत रहेका गीतकार ढुंगेलले घिमिरेको गीतिसंग्रह ‘विविधता’ मानिसको पीडा, संवेदना र चोटमाथि नै गीत लेखिने गरिन्छ, त्यसैको परिणती भएको बताए । गीतकार प्रकाशचन्द्र घिमिरेले पनि आफ्नो विधाभन्दा बाहिर रहेर गीत लेख्दा मुलुकले भोगेको चोटलाई नै केन्द्रमा राखेको बताए ।

गीतकार सुवासचन्द्र ढुंगेलको प्रमुख आतिथ्यतामा गीतकार संघका उपाध्यक्ष विपिन किरण, संगीतकार दिपक जंगम, अविद लगायतका अतिथिहरुको उपस्थितिमा गीतकार घिमिरेले ‘विविधता’लाई सार्वजनिक गरेका हुन् । गीत सार्वजनिक भएपछि घिमिरेका गीतिसंग्रह विविधतामाथि अतिथिहरुले शुभकामना प्रदान गरेका थिए ।

एल्बमको संगीतको बारेमा समीक्षा गर्दै संगीतकार दीपक जंगमले गीतकारका शब्द आफैंले संगीत बोकेको बताएका थिए । एउटा वैज्ञानिकको गीत आफैंमा सुन्दर छ, संगीतकार जंगमले भने – कसैले नदेखेको गीतका शब्द घिमिरेले देखेका रहेछन् । सफलताको शुभकामना दिँदै ७५ जिल्लामा करिब ७२ जिल्ला घुमिसकेका घिमिरेले लेखेको गीतभित्र मुलुकको समग्र विकास अट्न सफल भएको छ, एउटा मार्गचित्र निर्माण भएको छ र मायाप्रेम पनि देशभित्र नै देखिएको छ, संगीतका जंगमले भने । गीतकार नृपध्वज खड्काको सभापतित्वमा सम्पन्न भएको उक्त कार्यत्र mम पुल्चोक इन्जिनियरिङ क्याम्पसको उर्जा विभागको सभाहलमा सम्पन्न भएको थियो ।

गीत लेखनमा लागेका गीतकारहरुले प्राय गरेर मायाप्रेमभित्रको लेखनलाई मात्र प्राथमिकता दिएको पाइन्छ तर समग्र देशको चिन्तन गर्ने कमै पाइन्छ । देशको राष्ट्रियतालाई होस् वा जल, जमिन, जडिबुटीका कुराहरु हुन् गीतबाटै प्रस्तुत गर्नेहरु सायदै कमै भेटिन्छन् । मुलुकभित्रको विविधतालाई केन्द्रविन्दुमा राखेर गीतकार प्रकाशचन्द्र घिमिरेले भने ‘विविधता’ नै बजारमा ल्याएका छन् । पेशाले इन्जिनियरिङ क्याम्पसमा कार्यरत भए पनि उनले आफ्नो कामको सिलसिलामा घुमेका नेपालका जिल्लाहरुमा देखिएको भुगोल र त्यहाँको सम्भावनाभित्र रहेर गीत सिर्जना गरेका थिए । गीतकार घिमिरेल तिनै गीतहरुलाई समावेश गरेर ‘विविधता’ बजारमा ल्याएका हुन् । अरु भन्दा फरक विषयलाई रोजेर देशभित्रका सम्भावना र चुनौति अनि राष्ट्रियता र राष्ट्रप्रेमको कुरालाई गीतमार्फत् उजागर गरेका छन् घिमिरेले ।

गीतिसंग्रह विविधताभित्र जल जमिन, ढुंगा पनि, जमिन छोडी, चाउरिएर अनुहार, कलकल बग्छ, जन्मेपछि जस्ता गीत समावेश गरिएको छ । जसमा दीपक जंगम, अविद, सन्तोष श्रेष्ठ र सन्तोष रजौरेको संगीत रहेको छ । उक्त गीतमा संगीता राना प्रधान, रविन शर्मा, अजर जंगम, कृष्णभक्त राई, रिता केसी र सन्तोष रजौरेकै स्वर रहेको छ । प्रकाशचन्द्र घिमिरेको एकल रचना रहेको विविधताको प्रस्तुतकर्ता भने रमा घिमिरे हु्न् ।