![](https://musickhabar.com/wp-content/uploads/DNA-announcement-poster-300x150.jpeg)
गायिका रेणु मोक्तानले आफ्नो गीतिसंग्रह परिचय सार्वजनिक गर्दै कार्यक्रममा उपस्थित संचारकर्मीहरुलाई भनिन् – ‘मलाई कुन परिचय दिनुहुन्छ त्यो तपाईंहरुको हातमा छ ।’ गीतसंगीतमा गरिएको ठूलो संघर्षबाट परिचय खोज्दै गरेको बेलामा गीतिसंग्रह परिचय लिएर आएको उनले बताइन् ।
गायिका रेणु मोक्तानको तेस्रो लोकआधुनिक गीतिएल्बम ‘परिचय’ काठमाडौंमा एक कार्यक्रमको आयोजना गरी सार्वजनिक गरिएको हो । कार्यक्रममा उपस्थित सम्पूर्ण पत्रकार एवं संगीतकर्मीहरुलाई प्रमुख अतिथि बनाएर आयोजना गरिएको उक्त कार्यक्रममा नेपाल सांगीतिक संघका महासचिव सन्तोष श्रेष्ठ, म्यूजिक डायरीका प्रधान सम्पादक तुलसी गिरी भावुक र साहित्यकार घनश्याम राजकर्णिकारको हातबाट परिचयलाई सार्वजनिक गरिएको थियो ।
त्यस्तै कार्यक्रममा बोल्दै नेपाल सांगीतिक संघका महासचिव सन्तोष श्रेष्ठले गायिका रेणु मोक्तानको एल्बम परिचयलाई हेर्दा पक्कै पनि उहाँको मेहनत महत्वपूर्ण भएको बताएका थिए । उनले परिचयका गीतहरुले पक्कै पनि गायिका मोक्तानको सांगीतिक परिचयलाई स्थापित गराउनेछ भन्दै एल्बमको सफलताको शुभकामना दिएका थिए ।
त्यसैगरी म्यूजिक डायरीका प्रधानसम्पादक तुलसी गिरीले पछिल्लो समय गीतसंगीतको क्षेत्र धरासायी बन्दै गएको अवस्थामा गायिका रेणु मोक्तानको आगमन र लगानीले पक्कै पनि महत्वपूर्ण भूमिका खेल्ने आशा लिएको बताए । गिरीले एउटा एल्बम निर्माण गर्दा धेरै मेहनत गर्नुपर्ने र लगानीका हिसाबले पनि परिचय राम्रो बनेको बताएका थिए । म्यूजिक खबर डटकमको आयोजनामा भएको उक्त कार्यक्रमलाई म्यूजिक खबरका सम्पादक सबिता पोखरेलले संचालन गरेकी थिइन् ।
परिचय एल्बममा ढुंगालाई देउता सम्झी, आप्पाको छोरी, तिमीलाई मैले, यो आँखालाई, जल्छ मुटु, मुटुको माझैमा, लायो लायो, जे हुनु थियो, काली काली, आसेङ्गको छोरा जस्ता १० वटा गीत समावेश गरिएको छ । जसलाई जीवन बमजन, सोनिका लामा, बुद्धवीर लामा, समीर राई, टीका बमजन, तिलक पाख्रीन र गायिका मोक्तानको गीत रचना रहेको छ । त्यस्तै टीका बमजन, सोनिका लामा, रेणु मोक्तान, शान्तिराम राई, पुस्कर सुनुवारको संगीत रहेको छ । परिचयलाई शुभकामना मिडिया सोलुसनबाट बजार प्रबद्र्धन गरिएको छ ।