अमेरिका । गायक एवम् संगीतकार कन्हैया सिंहलाई सल्ट लेक सिटि युटामा नेपाली समुदायद्वारा सम्मान गरिएको छ । युनाइटेड नेप्लिज आर्टिस्ट एसोसिएसन, नर्थ अमेरीका “युनाना“ को युटा शाखा र भुटानी कम्युनिटी युटाको संयुक्त आयोजनामा शुभकामना एवम् बिबिध सांस्कृतिक कार्यक्रममा गायक सिंहलाई सम्मान गरिएको हो ।

गायक सिंहले डेढ दशकभन्दा बढी नेपाली कलाकारिता, गायन एवं संगीत क्षेत्रमा अविरल योगदान पु¥याउनुका साथै नेपाली कला संस्कृतिलाई विश्वव्यापीकरण गर्दै संस्थागत रुपमा युनानाको अध्यक्षजस्तो गरिमामय पदमा रहेर कार्य गरिरहनुभएको भन्दै गायक सिंहलाई सम्मान गरिएको थियो । भुटानी कम्युनिटीका अध्यक्ष रेम न्यौपानेले सिंहलाई सम्मान पत्र सहित सम्मान गरेका हुन् ।

उक्त कार्यक्रममा युनानाका उपाध्यक्ष उज्ज्वल अर्याल, महासचिव राजु बजाज, युटा शाखाका अध्यक्ष पूर्ण गौतम, सचिव ईश्वर प्रवासी लगायत सबै सदस्यहरु सहभागी हुनुका साथै स्थानिय कलाकारहरुको पनि रोचक प्रस्तुति रहेको थियो । कार्यक्रममा सयौंका संख्यामा आएका नेपाली दर्शकहरुले विविध संस्कृतिक कार्यक्रमलाई रुचिपूर्ण अवलोकनका साथै नाचगान गर्दै खुशियाली मनाएका थिए ।