समय अनुसारको बाजा बजाउनु हाम्रो परम्परा हो । यो मंसिरको महिना, कसैले पञ्चेबाजा बजाउँछन् कसैले ढोल । संगीतकार विपिन आचार्य र अभिनेत्री अनु शाह भने यतिबेला ढोल बजाउँदैछन् । उनीहरुको ढोल बजाइले अब धेरैलाई ब्यूँझाएको छ । संगीतको क्षेत्रमा व्यस्त संगीतकार हुन् विपिन आचार्य र चलचित्र अभिनयमा चर्चा बटुलेकी अनुको यो जोडीले ढोल बजाएपछि अब केही हुनेवाला छ ।

गीतिलेखनको क्षेत्रमा आफूलाई व्यस्त बनाएका गीतकार शिव पी. सुवेदीको शब्द रचना रहेको एवम् चर्चित गायिका माण्डवी त्रिपाठीको स्वर रहेको गीत ढोल बज्यो, बज्यो सहनाई बोलको गीतको म्यूजिक भिडियो निर्माण गरिएको छ । चर्चित संगीतकार विपिन आचार्यको संगीत रहेको यस गीतको म्यूजिक भिडियोमा विपिन आफैं मोडलिङ गरेका छन् । चलचित्र मेरो एउटा साथी छ, श्रीमान श्रीमती, इकु ब्याक अगेन, ब्ल्याकमेल, उहिलेको बाजेको पालामा, विरात, माइ ब्रदर, सुन्तलीलाई भगाइ लग्यो झिल्केले लगायत दर्जनभन्दा चलचित्रमा संगीत दिइसकेका विपिनले आधुनिक, पप, लोक र भाषभाषीको गीतहरुमा भने सयौंको संख्यामा संगीत दिइसकेका छन् । त्यस्तै भिडियोमा मोडलिङ गर्दै आइरहेकी अभिनेत्री अनु शाह पनि चलचित्रको क्षेत्रमा दर्जनौं चलचित्रमा अभिनय गरिसकेकी अभिनेत्री हुन् । ढोल बज्यो बोलको गीतमा अनु र विपिनको जोडीलाई राम्रो सुहाएको प्रतिक्रिया मिलेको छ ।

म्यूजिक भिडियोलाई वसन्त निरौलाले निर्देशन गरेका हुन् भने पवित्रा आचार्यको कोरियोग्राफी रहेको छ । दिव्य सुवेदी र दिनेश वान्तवाको छायाँकन रहेको यस म्यूजिक भिडियो रोमान्टिक शैलीको बनेको बताइएको छ ।