हेटौंडा । दर्जनौं म्यूजिक भिडियोमा निर्देशनको कला पस्किसकेका निर्देशक प्रकाश भट्ट यतिबेला पार्वतीसँग विभिन्न कार्यक्रममा नाच्दै हिंड्न थालेका छन् । उनी पार्वतीलाई सँगै लिएर हिंडेको मात्र होइन तिमी राम्रो हाँसोले भन्दै सँगै नाच्न पनि थालेका छन् । हिजोसम्म पार्वतीलाई अरुको म्यूजिक भिडियोमा नचाउने प्रकाश अहिले आफूसँगै नचाउन पाउँदा पार्वती हाँसो राम्रो छ भनेर किन नभनून र ?
बुधबार हेटौंडामा भएको महोत्सवमा प्रकाश भट्ट र पार्वती राईको जोडीले तिमी राम्रो हाँसोले, निधारैमा लेखेसी र एबीसीडी बोलको गीतमा नृत्य प्रस्तुत गर्दा दर्शकदीर्घाबाट ताली बजेको थियो । उनीहरुको नृत्यलाई वान्स मोर मिलेको थियो । त्यस्तै गायक रामजी खाँडको गायनले पनि दर्शक र स्रोताहरुको मन जित्न सफल भएका थिए भने गीतसँगै दर्शकहरु नाचेका थिए । त्यसैगरी भद्रगोलका बलेको हाँस्यव्यंग्यले पनि सबैलाई हँसाएको थियो ।
आजभोली महोत्सवको मौसम हो, त्यसैले पनि जिल्ला जिल्लामा भएको महोत्सवले कलाकारहरुलाई व्यस्त बनाइरहेको बेला यो समूह पनि व्यस्त हुँदै हेटौंडादेखि पोखरा हुँदै विभिन्न महोत्सवमा आफ्नो कला प्रस्तुत गर्न हिंडेको छ ।