काठमाडौं, १५ असार । संगीत रोयल्टी संकलन समाजमा पुनः सुरेश अधिकारीको नेतृत्व आएको छ । समाजको सातौं साधरणसभाले सुरेश अधिकारीलाई अध्यक्षमा पुनः निर्वाचित गरेको हो । २ सय ९५ मत खसेकोमा गीतकार संघ नेपालका तर्फबाट अध्यक्ष पदमा उम्मेदवारी दिएका गीतकार बी.पाण्डेले १०१ मत प्राप्त गरेका थिए भने सुरेश अधिकारीले १९० मत ल्याएर विजयी बनेका थिए ।
त्यस्तै संगीतकार सदस्यतर्फको मतदानमा ७ जनाको उम्मेदवारी परेकोमा श्रीकृष्ण बममल्लले २२६ मत ल्याएका थिए भने संगीतकार सन्तोष श्रेष्ठको २०२ मत ल्याएर विजयी बनेका थिए । सदस्यहरुमा सबैभन्दा बढी मत ल्याउनेमा श्रीकृष्ण र श्रेष्ठ देखिएका थिए । त्यस्तै संगीतकार सदस्यमा नै लोचन भट्टराईले १९७, रमेशराज भट्टराईले १९४, पारस मुकारुङले १५१ मत ल्याएर विजयी भएका थिए ।
त्यसैगरी गीतकार सदस्यमा भारी मत ल्याएर विजयी हुनेमा लोकराज अधिकारी र रमेश बिजी अगाडि देखिएका छन् । लोकराजले १८३ मत ल्याएका थिए भने रमेश बिजीले १८२ मत ल्याएर गीतकार सदस्यमा विजयी बनेका थिए । त्यस्तै दयाराम पाण्डे १७२, शिव सुवेदी १४०, ललित कुँवर १३६ मत ल्याएर विजयी बनेका थिए । संगीत रोयल्टी संकलन समाजमा निर्वाचित भएका अध्यक्ष सुरेश अधिकारसहितको सम्पूर्ण सदस्यहरुलाई म्यूजिक खबर डटक हार्दिक बधाई एवं सफल कार्यकालको शुभकामना व्यक्त गर्दछ ।