काठमाडौं । दुई दशकअघि बजारमा आएको चर्चित गीत हो ‘दमौलीमा गेट’ । गायक भगवान भण्डारीको गीत ‘खैरनीमा गेट’ आएपछि मुलुकभरका गेटहरुले गीतमार्फत परिचय पाएका थिए । त्यही मेसोमा बजारमा आएको गीत थियो ‘दमौलीमा गेट’ पनि । गायक घमेश दुलाल, गायिका बिमा कुमारी दुरा र गायक राजेन्द्र कुमार कार्कीको स्वरमा आएको यो गीत सर्वाधिक चर्चामा थियोे । त्यतिबेला नै यो गीतको पचास हजार भन्दा बढी क्यासेट बिक्री भएको र त्यो क्यासेटको कभरमा आफुले हस्ताक्षर गरेको ताजा स्मरण छ गायक राजेन्द्र कुमार कार्कीसँग । गायक राजेन्द्र कुमार कार्कीको संगीतमा रहेको यो गीत यतिबेला भने नयाँ एरेन्जमेन्टमा बजारमा आएको छ । अर्थात् यो गीतलाई बिर्सिसकेका स्रोताहरुलाई पुनर्ताजगी दिने प्रयास गरिएको छ ।

‘दमौलीमा गेट’ गीतलाई यतिबेला गायकहरु राजेन्द्र कुमार कार्की, चन्द्र शर्मा, अमृत खाती तथा गायिकाहरु सुस्मा शाही ठकुरी, सुनिता बागदास र सीमा थापाको स्वरमा बजारमा ल्याईएको छ । यसपटक शब्द सुस्मा शाही ठकुरी र राजेन्द्रले लेखेका हुन् । गीतको नयाँ एरेन्ज भने कृष्ण केसीले गरेका छन् ।

यो गीतको भिडियोलाई मौसम हिमालीले निर्देशन गरेका छन् । भिडियोमा मोडल लोमस शर्मा र जुना बिश्वकर्माले अभिनय गरेका छन् । उत्सव दाहालको छायांकन रहेको भिडियोमा मनोज कार्कीको सम्पादन रहेको छ । गीतको भिडियो सुस्मा शाही ठकुरी युट्युब च्यानलमार्फत सार्वजनिक गरिएको छ ।