![](https://musickhabar.com/wp-content/uploads/DNA-announcement-poster-300x150.jpeg)
१२ पुष, काठमाडौं । पछिल्लो समय यूट्यूबमा अश्लिल रुपमा अन्तरवार्ताहरु दिँदै आएका कलाकारहरुलाई राष्ट्रिय लोक तथा दोहोरी गीत प्रतिष्ठान नेपालले सदस्यता र विदेशका लागि राम्रो कलाकार हो भनी लिने सिफारिस समेत नदिने भएको छ । संचारमाध्यमको नाम दिएर समाजमा आँच आउने खालका अन्तरवार्ता लिने र अश्लिलता प्रस्तुत गरी अन्तरवार्ता दिने कलाकारहरुलाई कारवाहीको माग गर्दै बहिरष्कार गर्ने निर्णयसहित संगीत कला पत्रकार संघले विज्ञप्ति जारी गरेपछि गीतसंगीतको क्षेत्रमा लागेका संघसंस्थाहरुले ऐक्यबद्धता जनाउन थालेका हुन् ।
संघको निर्णयसँगै प्रतिष्ठानमा सिफारिस लिन र आजीवन सदस्यता लिन पुगेकी एक गायिकालाई सिफारिस र सदस्यता दुबै दिन नमिल्ने भन्दै प्रतिष्ठानका अध्यक्ष बद्री पंगेनीले फिर्ता पठाइदिएका थिए । पंगेनीका अनुसार उक्त गायिले आफूले गरेका क्रियाकलाप गलत भएको भन्दै आफूलाई सम्झाउने कोही नभएकाले यस्तो भएको स्वीकार गर्दै अब सच्चिने बताएकी छन् । ती गायिकाले प्रतिष्ठानको सदस्यता लिनका लागि गीत गाएर मात्र नहुने बताउँदै पंगेनीले अश्लिल हाउभाउ र बोलीले अन्तरवार्ता दिएर सस्तो लोकप्रियता कमाउन खोज्नेलाई प्रतिष्ठानभित्र अटाउन नसक्ने बताए ।
खास गरी प्रतिष्ठानको सदस्यता र सिफारीस लाई कलाकार भएको प्रमाणको रुपमा प्रयोग गर्ने गरिन्छ । कलाकारहरु विदेशमा आयोजना भएका कार्यक्रमहरुमा जाँदा प्रतिष्ठानको आजीवन सदस्यता साथै प्रतिष्ठानले दोहोरी कलाकार हो भनेर दिएको प्रमाणपत्रलाई दुताबासहरुले पनि अनौपचारीक रुपमा मान्यता दिंदै आईरहेका छन् । प्रतिष्ठानकै सदस्यता, सिफारीस, परिचय पत्रको आधारमा राष्ट्रिय कलाकारको परिचय दिलाउन खोज्नेले सामाजिक मूल्य र मान्यता पनि बुझ्न जरुरी छ, अध्यक्ष पंगेनीले म्यूजिक खबरलाई बताए । पंगेनीले योभन्दा अघि पनि अश्लिलता प्रस्तुत गरेको नाममा केही गायक गायिकालाई कारवाहीको प्रक्रियामा लैजानु पर्ने आवाज उठाउँदै आएका थिए । प्रतिष्ठानमा उनको आवाज एक्लै भएका कारण आफू यो विषयमा एक्लो भएको बताउँदै अध्यक्ष पंगेनीले अबका दिनमा पनि यस्ता गतिविधि गर्नेहरुविरुद्ध सम्पूर्ण कलाकार, संघसंस्था एकजुट हुनुपर्ने बताए ।
यतिबेला यूट्यूब हेर्न नसक्नेगरी फोहारी बन्दै गएको हुँदा यसरी गीतसंगीत र संचारमाध्यमका नाममा अश्लिलता पस्कनेहरुलाई अब सम्पूर्ण संघसंस्था मिलेर नीति नियम बनाउनु पर्ने आजको आवश्यकता भएको छ, अध्यक्ष पंगेनीले भने – ‘राज्य चुप लाग्यो, राज्यले बनाएन भन्दा पनि अब हामी संघसंस्था मिलेर टीभीका नाममा यूट्यूबमा आउने अश्लिल भिडियोहरुलाई हटाउने पहल गर्नुपर्छ ।’
यो पनि पढ्नुस्