गीतसंगीत व्यवसायमा लागेका संगीतकर्मीहरुको छाता संगठन संगीत उत्पादक समाज नेपालको पहिलो साधारणसभामा विन्ध्यवासिनी म्यूजिकका प्रबन्ध निर्देशक सुवास रेग्मीले अध्यक्ष पदमा उम्मेदवारी दिँदै आफ्नो प्यानल नै सार्वजनिक गरेका छन् । शुक्रबार विहान ११ बजे सामुदायिक भवन घट्टेकुलोमा सम्पन्न हुन गइरहेको उत्पादक समाजको साधारणसभाबाट नयाँ कार्यसमिति चयन गरिने भएको हुँदा रेग्मीले आफ्नो प्यानलको नाम सार्वजनिक गरेका छन् ।
अध्यक्षका उम्मेदवार रेग्मीको प्यानलमा उपाध्यक्षमा रामजी प्रसाद पन्त (आशिष म्यूजिक), महासचिवमा शिव पौडेल (पशुपति म्यूजिक), सचिवमा ईश्वर गुरुङ (एसियन म्यूजिक), कोषाध्यक्षमा रामकुमार शिवाकोटी (अम्बिका म्यूजिक) को उम्मेदवारी रहेको छ । त्यस्तै सदस्यहरुमा सुनिल लामिछाने (गौर्खा चौतारी म्यूजिक), घनश्याम अधिकारी ‘विमल’ (भावना म्यूजिक), शोभाकान्त सापकोटा (जनता डिजिटल), सहदेव कोइराला (बागिना म्यूजिक) को उम्मेदवारी रहेको छ ।

“रोयल्टीको व्यवस्थापन, व्यवसायी र संस्थाको जीउने आधार – संगीत उत्पादक समाज एउटा महत्वपूर्ण पूर्वाधार” भन्ने मूल नारा लिएर सुवास रेग्मीको प्यानलले उम्मेदवारी दिएको हो । १०८ सदस्य रहेको यस संस्थाको पहिलाको संस्थाले पदम बुढाको अध्यक्षतामा तदर्थ समिति गठन गरेर चलिरहेको थियो । बुढाकै अध्यक्षतामा रहेको संगीत उत्पादक समाज नेपाल नै नाम गरेको संस्थाको नविकरण गर्ने म्याद गुज्रेपछि संस्था खारेजी भएको थियो । पुनः संगीत उत्पादक समाज नाम दिएर पदम बुढाकै अध्यक्षतामा नयाँ संस्था दर्ता भएपछि पहिलो साधारणसभा शुक्रबार हुने भएको हो । संस्थाको हकअधिकारका पक्षमा वकालत गर्ने संगीत व्यवसायको सुनिश्चितताको लागि लड्ने प्रद्धिबद्धताका साथ रेग्मीले आफ्नो प्यानलको उम्मेदवारी दिइसकेका छन् भने अहिलेसम्म अन्य प्यानलले उम्मेदवारी दिएका छैनन् ।