काठमाडौं, १ बैशाख । गायक रामकृष्ण ढकालले तेश्रो सुमधुर साँझ २०७० सम्पन्न गरेका छन् । नयाँ वर्षको सुरुवातसँगै नयाँ सोचमा लागेका ढकालले आफ्नो सुमधुर साँझलाई अन्तर्राष्ट्रिय स्तरको साँझ भएको दाबी गरेका छन् । २५ जना बाद्यवादनको टोलीसहित एकल गायनमा उत्रिएका ढकालले गायिका संगीता राणा, ज्ञानु राणाको साथमा आफ्नो चर्चित गीतहरुलाई प्रस्तुत गरेका थिए ।
स्वरसम्राट नारायण गोपालको निधनपछि उनको अभावलाई पूर्ति गर्न ढकालको गायन यात्राले ठूलो योगदान गरेको छ । नारायण गोपालकै निरन्तरतामा ढकाललाई लिइने गरिएको छ । ढकालको गायन यात्रामा गाइएका चर्चित गीतहरुलाई सुमधुर साँझमा प्रस्तुत गरेका थिए । विहान उठ्ने वित्तिकै हिमाल देख्न पाइयोस् बोलको गीतबाट आफ्नो प्रस्तुतिको उद्घाटन गरेका ढकालले ओराली लागेको हरिणको चाल भो लगायतका एक दर्जनभन्दा बढी गीत प्रस्तुत गरिएको थियो । उनको गायनका अलावा विश्व नेपाली, प्रकाश तिमिल्सिनाले आफ्नो प्रस्तुतिहरु दिएका थिए भने जितु नेपालले दर्शकहरुलाई हँसाएका थिए । ग्रीस्मा इन्टटेनमेन्टको आयोजनामा होटल याक एण्ड यतिमा सम्पन्न भएको गरिएको उक्त कार्यक्रमलाई अहिलेसम्मकै उत्कृष्ट एकल साँझका रुपमा लिइएको थियो । उक्त अवसरमा दृष्टिविहीन गायक प्रकाश तिमिल्सिनाको आँखा प्रत्यारोपणका लागि एक लाख रुपैयाँ हस्तान्तरण गरिएको थियो ।
उक्त अवसरमा गायक ढकालले नयाँ वर्षको सुरुवातसँगै आफ्नो नयाँ गीतिसंग्रह निहुराउको सार्वजनिक गरेका थिए । उत्तम सञ्जेलको रचना, न्ह्यू बज्राचार्यको संगीतमा गायक ढकालको एकल स्वर समावेश गरिएको उक्त एल्बमलाई ९ वटा गीतहरु समावेश गरिएको छ । न हुन्न भन्छे उ, एउटा पत्र आउला, तिम्रो मलाई माया, आँखैभित्र छिरौंन, तिम्रो रुप मेरो मन, मनै मान्दैन, मुसुक्क हाँस्दैमा, तिमी छौ माया छ, फूल रोप्न चाहनेले जस्ता गीतहरु रहेका छन् ।