काठमाडौं । गायिका स्वरुपा रसाईली, संगीतकार वीवी अनुरागी र गीतकार विजयकुमार सुनारको संयुक्त गीतिसंग्रह ‘साक्षी’ सार्वजनिक भएको छ । इन्द्रेणी फुडल्याण्ड बानेश्वरमा शनिबार एक कार्यक्रमको आयोजना गरी साक्षीलाई सार्वजनिक गरिएको थियो । प्रमुख संगीत नाट्य प्रज्ञा प्रतिष्ठानका कुलपति साहित्यकार सरुभक्त, निर्देशक, संगीतकार एवं गायक नारायण रायमाझी, गायक शिशिर योगी, गीतकार रमेश पौडेल, गायक गोविन्द गुरुङ लगायतका हातबाट साक्षीलाई सार्वजनिक गरिएको थियो ।

कार्यक्रममा स्वागत मन्तव्य दिँदै संगीतकार वीवी अनुरागीले भावुक बन्दै गायिका बहिनी स्वरुपा र ध्वनि मुद्रक भाइ श्यामश्वेत रसाइलीको माया, स्नेह र कर्तव्यका बारेमा बोलेका थिए । अनुरागीले दसैंमा टीका लगाएर आएको दक्षिणा जम्मा गरेर मेरो पढाईलाई साथ दिएका थिए । मेरी आमाले आरनबाट छुटाएर मलाई पढ्न र संगीतमा क्षेत्रमा लाग्न प्रेरित गर्नुभयो र हामी यो ठाउँमा आइपुग्यौं, अनुरागीले आँसु झार्दै कार्यक्रममा बोले ।

त्यस्तै कार्यक्रममा एल्बमको समीक्षा गर्दै गायक शिशिर योगीले गायिका स्वरुपा रसाइलीको रोमान्टिक गीतलाई न्याय दिन सफल भएको बताएका थिए भने स्लोगीतमा त्यति न्याय हुन नसकेको बताएका थिए । तर एल्बममा उनले दिएको एकल स्वर समधुर बन्न सफल भएको भन्दै स्वरुपाको प्रशंसा गरेका थिए । योगीले संगीतकार वीवी अनुरागीको परिवार नै सांगीतिक भएको र आफ्नै परिवार जस्तै लाग्ने गरेको बताएका थिए ।

त्यस्तै गीतकार रमेश पौडेलले गीतका बारेमा समीक्षा गर्दै सरल, कर्णप्रिय गीत बन्न सफल भएको बताउँदै गायिका स्वरुपाको सांगीतिक भविश्य उज्ज्वल भएको बताएका थिए । त्यसैगरी संगीतकार, गायक एवं निर्देशक नारायण रायमाझीले यदि बीबी अनुरागीको परिवार नभएको भए मेरो सांगीतिक करिअर पनि यो ठाउँमा हुने थिएन भन्दै गायिका बहिनी स्वरुपाको स्वर सुन्दर भएको बताए । रायमाझीले आफ्ना विगतको दिनहरु स्मरण गर्दै गायिका स्वरुपा, संगीतकार अनुरागी र श्यामश्वेत रसाइलीसहितको सांगीतिक परिवार आफ्नो काममा दक्ष भएको परिवार बताए ।

त्यस्तै गायक गोविन्द गुरुङले गायिका स्वरुपाको साक्षीलाई शुभकामना दिँदै संगीतकार अनुरागीको संगीत मन परेकै कारण आफूले पनि उहाँको संगीतमा गीत गाएको उल्लेख गरे । लोकआधुनिक शैलीको सरल र मिठासपूर्ण संगीत निर्माण गर्ने अनुरागीको कलामा जादू भएको गायक गुरुङले बताए ।

आफ्नी आमालाई सभापति बनाएर कार्यक्रमको आयोजना गरिएको उक्त विमोचन कार्यक्रममा गीतसंगीत क्षेत्रका विशिष्ट व्यक्तित्वहरुको उपस्थिति रहेको थियो भने स्वरुपाको एक गीतमा संगीतकार अनुरागीको छोरी शिक्षाले एउटा नृत्य प्रस्तुत गरेकी थिइन् । एल्बममा स्वरुपा रसाइलीको एकल स्वर, वीवी अनुरागीको एकल संगीत एवं एरेन्ज र विजय कुमार सुनारको एकल शब्द रचना रहेको छ । एल्बममा ७ वटा गीत समावेश गरिएको छ ।