शिवकुमार काशी, मनहरि (हेटौंडा), २५ भाद्र
केही समय प्रवासमा बसेर नेपाल फर्किएका गायक तथा संकलक बुद्धिमान घिसिङले मनहरिको जंगलमा घाँस काटेझैं गरेर कसैसँग पिरती गाँस्दै गरेको जस्तो देखिन्छ । गायक गायिका भनेपछि ग्ल्यामर क्षेत्रमा अलि बढी आफूलाई देखाउँछन् भनेजस्तै जंगलमा मायाप्रेम गाँस्दै गर्दा यी गायकलाई परिवारले देखे भने के भन्लान् कुन्नी ?
मनहरिका गायक तथा लय संकलक बुद्धिमान घिसिङले आफ्नो नयाँ एल्बम ‘दशंै’को छायाँकन कार्य सुरु गरेका छन् । निर्देशक शंकर बिसीको निर्देशनमा दशैंको छायाँकन सुरु गरिएको हो । छायाँकनका लागि काठमाडौंबाट बिसीको साथमा गाययिका विनु लामा, मोडल गीता राई मनहरि आइपुगेका छन् । मनहरि–४ सिम्पानीमा रहेको घिसिङको घर, सामुदायिक वनको क्षेत्र लगायतका रमणीय स्थानहरुमा छायाँकन गरिने उक्त गीतले परदेशबाट श्रीमान घर नआउँदाको पीडालाई उल्लेख गरेका छन् । परदेशी घर नआएपछि परिवारले भोग्नुपरेको मानसिक पीडामा दशैं कस्तो हुन्छ भन्ने कुरा म्यूजिक भिडियोमा उतार्ने प्रयास गरिएको छ । छायाँकनमा चेपाङ जातिका पहिलो गायक रविनकुमार चेपाङ, गायक सुन्दर लामा लगायतको सहभागीता रहेको थियो । दशैं एल्बम छायाँकन लगत्तै छिट्टै नै सार्वजनिक गरिने कुरा गायक बुद्धिमान घिसिङले बताए ।