गायक विजय लामाले आफ्नो सातौं एल्बम मेरो गीत सार्वजनिक गर्दा भने – ‘मिडियाले मलाई कहाँ हराउनुभएको थियो भनेर सोध्नुभयो, मैले भने गायकको काम गीत गाउने हो जहिले आए पनि गीत नै बोकेर आउँछ म हराएको छैन ।’ विमोचन कार्यक्रममा मन्तव्य दिँदै विजयले ठट्यौली पारामा भने – ‘यदि म हराएँ भने अमेरिकामा कन्सर्ट गर्दैछ भनेर बुझ्नु । किनकी अमेरिकामा बस्दै आउनुभएका सोनाम लामा आज प्रमुख अतिथि हुनुहुन्छ ।’

निरन्तर पप गायनमा सक्रिय रहेका विजय लामाले स्रोताका लागि धेरै चर्चित गीत दिए । करिब पाँच वर्षको अन्तरालमा हराएका लामाले आफ्नो सातौं सांगीतिक कोसेली ‘मेरो गीत’ सार्वजनिक गरेका छन् । कार्यक्रमको प्रमुख अतिथिका रुपमा सदाबहार अभिनेत्री करिश्मा मानन्धर र अमेरिकामा बसोबास गर्दै आएका एनआरएन आइसीसी सदस्य सोनाम लामाको हातबाट विजयले मेरो गीतलाई सार्वजनिक गरेका हुन् ।

कार्यक्रममा सदाबहार अभिनेत्री करिश्मा मानन्धरले गायक लामालाई शुभकामना दिँदै विजयका बारेमा प्रशंसा गरेकी थिइन् । उनले विजयलाई गीत सिकाउँछु भन्ने उनले आफ्नो प्रदर्शनको पर्खाइमा रहेको चलचित्र फागुको गीत गाउन लगाएकी थिइन् । त्यस्तै सोनाम लामाले विजयको एल्बमको सफलताको शुभकामना दिएका थिए । ककटेल पार्टीसहित आयोजना गरिएको उक्त कार्यक्रममा संगीत, चलचित्र एवं अभिनयका क्षेत्रमा नाम कमाएका हस्तीहरुको बाक्लो उपस्थिति रहेको थियो ।

उक्त कार्यक्रममा मेरो गीत भित्र रहेको रिन काटी रुमाल, रोशी खोला पारी, नेपाली हुँ म गीतको म्यूजिक भिडियो पनि देखाइएको थियो । रिन काटी रुमाल, रोशी खोला पारी, नेपाली हुँ म, मुटुभरि माया छ, कति राम्रो गाउँघर, जुनेली रातमा, आजको ल्होसार मेलामा, मै पनि आए विदेशमा, मैच्याङ त कति राम्री, आज माया यहाँ, ए कान्छी, भोली फर्की आउँछु आउँदिनँ जस्ता गीत समावेश गरिएको छ ।

गीतहरु मिन सागर लामा, विश्व दोङ, बबीराज घतानी, शेर्पिनी कान्छी, सुसन लामा, लोटे प्रदीप राई, दिपेश किशोर भट्टराई, निमा रुम्बा, सुदेश न्यौपाने एवं विजय आफैंले लेखेका छन् । उक्त गीतहरुमा विक्रम जी लामा, विश्व दोङ, बबीराज घतानी, सुसन लामा, सुनिल सिंह, दिपेश किशोर भट्टराई, निमा रुम्बा, विक्रम थापा एवं विजय आफैंले संगीत भरेका छन् । मेरो गीत एल्बमलाई एसियन म्यूजिकले बजार प्रबद्र्धन गरेको छ ।