असार १३, काठमाडौं । नेपालमा धेरै जातजाती भाषाभाषिका समुदाय बसोबास गर्छन्, आ–आफ्नो जातजाती अनुसार धर्म संस्कृति भाषा तथा रितिरिवाज अनुसार मौलिक कला संस्कृति पस्कने गरेका हुन्छ । मनोरन्जन क्षेत्रमा समेत आफ्नो भाषा र संस्कृतिलाई पस्कने परम्परा सदियौंदेखि चलिआएको छ । गीत संगीत, चलचित्र, नाटक जस्ता विभिन्न माध्यमद्वारा मनोरञ्जनलाई पस्कँदै आएका जातजाति, भाषाभाषीहरुमा गुरुङ अर्थात् तमु समुदाय सबैभन्दा अगाडि रहेको पाइएको छ ।

यसैबीच काठमाडौँमा तमु (गुरुङ) कलाकार संघको आयोजनामा गुरुङ भाषा, संस्कृति, परम्परा चलचित्र निर्माण तथा विकास बारे एकदिने विचार गोष्ठी आयोजना गरी गुरुङ भाषा, कला संस्कृतिको विकास, विस्तारका बारेमा प्रष्ट पारिएको छ ।
चलचित्र विकास वोर्डको सहकार्यमा नेपाल सरकार सूचना तथा संचार मन्त्रालयका सचिव महेन्द्रमान गुरुङको प्रमुख आथित्यमा आयोजित उक्त गोष्ठीमा आदिवासी चलचित्रसंग सम्बन्धित विशिष्ट ब्यक्तिहरुको उपस्थिति रहेको थियो । यस्तै कार्यक्रमको बिशेष अथितीमा चलचित्र विकास बोर्डका सदस्य सचिव गुणराज श्रेष्ठ तथा तमु ह्युला गुरुङ राष्ट्रिय परिषद्का अध्यक्ष रेशम गुरुङ रहेका थिए ।

तमु ह्युल गुरुङ राष्ट्रिय परिषदको सभाहलमा आयोजित उक्त कार्यक्रममा अथिति रहेका चलचित्र कर्मी निर्देशक नबिन सुब्बाले एउटा कोठामा बसेर कथा लेखेर होइन गाउँ गाउँमा पुगेर कथा र पात्रत्रको अनुसन्धान गरेर मौलिक संस्कृतिमा चलचित्र बनाउनु पर्ने बताए ।

यस्तै आदिवासी चलचित्र प्रबद्र्धन समितिका तर्फबाट चलचित्र निर्माता ज्योतिराज राईले नेपालमा भएका आदिवासी जनजातीमध्ये गुरुङ समुदायले धेरै चलचित्र निर्माण गर्ने गरेकोमा खुशी ब्यक्त गर्दै समय समयमा मौलिक चलचित्र निर्माण र विकासबारे कार्यशाला गोष्ठीको आयोजना र चलचित्र प्रबर्दनमा जोड दिनु पर्ने बताए ।

यस्तै गुरुङ कलाकार, संगीतकार तथा गायक कृष्ण गुरुङले चलचित्र सफल हुनलाई गीत संगीतको भूमिका अहम हुने भन्दै मौलिक चलचित्रमा मौलिक गीत तथा संस्कृति अनिवार्य झल्कनु पर्ने तर्क राखेका थिए । तमु ह्युला गुरुङ राष्ट्रिय परिषदका अध्यक्ष रेशम गुरुङले अब गुरुङ चलचित्रले लाहुरे प्रथा भन्दा शिक्षा प्रणालीलाई समेटेर चलचित्र निर्माण गर्नु पर्नेमा जोड दिए ।
तमु (गुरुङ) कलाकार संघका अध्यक्ष राजु गुरुङको अध्यक्षतामा भएको उक्त कार्यक्रममा गुरुङ भाषाको गीतमा समेत अतिथि र सहभागीहरुले ऐकबद्धता जनाउँदै नाचेर कार्यक्रमको समापन गरिएको थियो । कार्यक्रमलाई संघका महासचिव लोकप्रिय गायक गणेश गुरुङले सञ्चालन गरेका थिए ।