काठमाडौं । पछिल्लो समय लोकदोहोरी क्षेत्रमा रुचाइएका गायक सागर बिसी र गीत गाएर भाइरल भइरहेकी बालगायिका कल्पना विष्टको स्वरमा नयाँ गीत सार्वजनिक भएको छ । ‘फूल रसैको’ बोलको उक्त गीत यतिबेला राम्रो भ्यूज पाउँदै युट्युबको ट्रेन्डिङमा अगाडि उक्लिरहेको छ ।

बिहिबार अपलोड भएको भिडियोले २४ घण्टा नबित्दै ट्रेन्डिङको यात्रा शुरु गरेको हो । यो समाचार तयार पार्दै गर्दा गीत संगीत तर्फबाट १८ नं. स्थानमा परेको छ । २ लाख ५८ हजार बढी दर्शकले हेरिसकेको भिडियोलाई ६७५ बढी कमेन्ट आएका छन् । अधिकांश कमेन्टमा बालगायिका कल्पनाको स्वरको तारिफ गर्दै उज्वल भविष्यको कामना गरिएको छ । त्यस्तै गायक सागर बिसीको स्वर र यथार्थपरक शब्दको पनि तारिफ गरिएको छ ।

गीतमा सुमन ढकालको मीठो लय सुन्न सकिन्छ । पवन परियारले संगीत संयोजन गरेको यस गीतलाई बिमल छिनालले मिक्सिङ तथा मास्टरिङ गरेका हुन् ।

गीतको भिडियोमा गायिका विष्ट र गायक बिसीको नै अभिनय रहेको छ । गायक–गायिकाले स्टुडियो डायानामिकमा गीत रेकर्ड गराइरहेको दृष्य भिडियोमा देखाइएको छ । भिडियो सुमन ढकालको अफिसियल युटुव च्यानलवाट सार्वजनिक गरिएको छ ।
यतिबेला कल्पनाको स्वर रहेका गीतले सांगीतिक बजार तताइरहेको । कल्पना सहित गायक अर्जुन सापकोटाको स्वर रहेको ‘मौरी रसैमा’ गीत केहीदिन देखि ट्रेन्डिङमै रहन सफल छ ।