काठमाडौं । राजधानीमा भएको अन्तर दोहोरी साँझ स्तरीय रोयल शुज दोहोरी गीत रनिङ शिल्ड नेपाली दोहोरी साँझ बसपार्कले चुमेको छ । लोक तथा दोहोरी गीत प्रतिष्ठान नेपालको आयोजनामा तीन दिनसम्म राजधानीको प्रज्ञा भवनमा चलेको अन्तर दोहोरी साँझ स्तरीय प्रतिस्पर्धामा नेपाली दोहोरी साँझका कलाकारहरुले उत्कृष्ट प्रस्तुति दिएकै कारण प्रथम स्थान हासिल गरेको छ । प्रथम स्थान हासिल गरेको नेपाली दोहोरीले ७७ हजार ७ सय ७७ रुपैयाँ नगदसहित रनिङ शिल्ड चुम्न सफल भएको छ । यस दोहोरीले उक्त रनिङ शिल्ड आफ्नो दोहोरी साँझमा ६ महिनासम्म सजाएर राख्ने र त्यसपछि प्रतिष्ठानलाई फिर्ता गर्नेछ ।
त्यस्तै बाग्लुङ कालिका दोहोरी साँझ बसपार्कले दोस्रो स्थान हासिल गर्दै नगद ५५ हजार ५ सय ५५ रुपैयाँ प्राप्त गरेको छ भने लजालु दोहोरी साँझ बिजुलीबजारले तृतीय स्थान हासिल गर्दै ३३ हजार ३ सय ३३ रुपैयाँ प्राप्त गरेको छ ।
त्यसैगरी उत्कृष्ट गायकका रुपमा राजु केसी र उत्कृष्ट गायिकामा डिला वि.क.ले सम्मान चुम्न सफल भए भने उत्कृष्ट भेषभुषाको सम्मान मायालु दोहोरी साँझले प्राप्त गर्यो । त्यस्तै कलाकारको अनुशासनमा पुरुषतर्फ रिमझिम दोहोरी साँझका श्रीराम अधिकारीले सम्मान चुम्न सके भने लजालु दोहोरीकी चिनु घर्तीले उत्कृष्ट अनुशासन महिलातर्फको सम्मान चुम्न सफल भइन् ।

त्यस्तै ७ हजार ७ सय ७७ रुपैयाँ राशिको पृथ्वी थकाली दोहोरी सम्मानबाट गायिका हरिमाया रायमाझी बुटवल, गायक चिजकुमार गुरुङ, लजालु दोहोरी साँझ र बबिता बानियाँ जेरी छहारी दोहोरी साँझले सम्मानित भए । लोकदोहोरी पारखी पृथ्वी थकालीले आफ्नो व्यक्तिगत तर्फबाट आफूलाई उत्कृष्ट लागेका तीनजना कलाकारलाई यो नगद राशिसहितको सम्मान प्रदान गरेका हुन् ।
अन्तर दोहोरी साँझहरुको यस रनिङ शिल्डमा २७ वटा दोहोरी साँझहरु सहभागी रहेका थिए भने फाइनलमा ७ खेल अर्थात् १४ टिमले प्रतिस्पर्धा गरेका थिए । उक्त अवसरमा विभिन्न संघसंस्था एवं लोकदोहोरी गीत पारखीलाई विभिन्न सम्मान गरिएको थियो ।

सोही अवसरमा लोक तथा दोहोरी गीत प्रतिष्ठान उपत्यका समन्वय समितिसहित ७ वटा समन्वय समितिहरुले लोकदोहोरी प्रतिष्ठान कलाकार कल्याणकारी कोषलाई ५१ हजार १ सय ५१ रुपैयाँ नगद सहयोग प्रदान गरेको थियो । कार्यक्रममा प्रतिष्ठानका संस्थापक अध्यक्ष अमर विरही गुरुङसहित नारायण रायमाझी, रमेश बिजी, बद्री पराजुली, दुर्गा रायमाझी, रामचन्द्र अर्याल, तेजबहादुर केसी, शर्मिला गुरुङलगायतको टोली निर्णायकमा रहेका थिए । कार्यक्रमको उद्घाटन सत्र प्रतिष्ठानका सचिव रमेश बिजीले संचालन गरेका थिए भने पहिलो दिन प्रतिष्ठानका पूर्व अध्यक्ष प्रजापति पराजुलीले दोहोरी खेललाई संचालन गरेका थिए । त्यस्तै दोस्रो र अन्तिम दिन प्रतिष्ठानका उपाध्यक्ष गायक बद्री पंगेनीले कार्यक्रम संचालन गरेका थिए । कार्यक्रमलाई आगामी दिनमा पनि निरन्तरता दिने प्रतिबद्धता जनाउँदै प्रतिष्ठानका अध्यक्ष चन्द्र शर्माले कलाकारको प्रतिभालाई रनिङ शिल्डको माध्यमले अझ प्रोत्साहन गर्न पाएकोमा खुशी व्यक्त गरेका थिए ।