शुभ दीपावली २०७२ को अवसरमा गोर्खा चौतारी म्यूजिकले गोर्खाली कलाकारहरुलाई भेला गर्ने भएको छ । कार्तिक २१ शनिबार राजधानीको सोह्रखुट्टचोकस्थित लेखनाथ सदनमा उक्त भेला राखिएको हो । गोर्खा चौतारी म्यूजिकले दीपावलीको शुभकामना आदानप्रदान गर्ने उद्देश्यले गोर्खा जिल्लाबाट काठमाडौं आई गीतसंगीत, चलचित्र, अभिनय क्षेत्रमा लागेका कलाकर्मीहरुलाई एकै ठाउँमा भेला गर्ने उद्देश्यले उक्त भेलाको आयोजना गरेको हो । गोर्खा जिल्लाबाट राजधानी छिरेर कलाकर्ममा लाग्ने कलाकार धेरै भए पनि एकै ठाउँमा भेला हुने अवसर नभइरहेको बेलामा गोर्खा चौतारी म्यूजिकले यो अवसर जुटाएको हो ।

कलाकर्ममा लाग्ने कलाकारहरुलाई एक थलोमा जम्मा गराएर कलाकारितामा गोर्खा जिल्लाको अवस्था कस्तो रहेछ भन्ने कुराको पनि उक्त अवसरमा छलपल गरिने र कलासंस्कृतिमा लागेका स्रष्टा, सर्जकहरुलाई एकैसुत्रमा बाँध्न संघसंस्थाको बारेमा पनि बहस चलाउने योजना रहेकोसमेत गोर्खा चौतारीका प्रबन्ध निर्देशक सुनिल लामिछानेले म्यूजिक खबरलाई जानकारी दिए । उनले सम्पूर्ण कलाकारहरुलाई यही सूचनालाई निम्तो मानी उपस्थित हुन पनि अनुरोध गरेका छन् ।