काठमाडौं । पछिल्लो समय साङ्गीतिक बजारमा नेपाली लोक गीत सङ्गीतको चर्चा परिचर्चा ह्वात्तै बढेको छ । लोक तथा दोहोरी गीत माया प्रेम र बिछोडले भरिएका गीतहरु बजारमा आउने क्रम जारी छ । यही क्रममा बजारमा आएको छ मदानीमा नेती । ‘मदानीमा नेती’ गायिका अमृता श्रीपाल र गायक विक्रम परियारको स्वरमा रहेको गीत हो । गीतको शब्द शरद पाण्डेको रहेको छ भने संगीत गायक विक्रम परियारकै रहेको छ । यस गीतको सहगायनमा सज्जन बोहरा, वसन्त विश्वकर्मा, कुमारी चेपाङ र निशा गुरुङले साथ दिएका छन् ।

नेपाली समाजमा हराउँदै गएको मौलिकतालाई गीतले जुरुक्क बोकेको छ । भिडियोमा आफ्नो प्रेमिकाको नजिक अरूले प्रवेश गर्दा रिसको आवेगमा निम्तिएको गम्भीर समस्या र प्रहरीको खोजी सूचिमा रहेका प्रेमी वरिपरि घुम्ने कथालाई फिल्मी शैलीमा प्रवीन थापाले आकर्षक शैलीमा तयार पार्दै निर्देशित गरेका छन् । राजेश घिमिरेले छायाँकन गरेको भिडियोमा सुधीर श्रेष्ठ र रबिना भण्डारीको उत्कृष्ट नृत्य देख्न सकिन्छ। गायक गायिका द्वयलाई प्रहरीको भूमिकामा पेस गरिएको उक्त म्युजिक भिडियो बाबा इन्ट्रटेन्मेन्टको अफिसियल युट्युब च्यानलमार्फत बजारमा आएको छ ।