काठमाडौं । गोरखा जिल्लाबाट काठमाडौंलाई कर्मथलो बनाएका कलासंस्कृतिसँग आबद्ध सदस्यहरुको सामाजिक संस्था ‘गोरखा सांस्कृतिक समाज’को नवौं वार्षिक साधारण सभा सम्पन्न भएको छ । चैत १८ गते स्थापना दिवसको अवसर पारेर राजधानीमा साधारण सभा सम्पन्न गरिएको हो ।
समाजका अध्यक्ष सुनिल लामिछानेको सम्पन्न कार्यक्रममा समाजका संस्थापक अध्यक्ष दिपसागर थापा प्रमुख अतिथि रहेका थिए ।

उक्त सभामा कार्यवहाक महासचिव टेक गुरुङले साङ्गठनिक प्रतिवेदन प्रस्तुत गरेका थिए भने कोषाध्यक्ष सचिन भट्टराईले आर्थिक प्रतिवेदन प्रस्तुत गरेका थिए ।
कार्यक्रममा समाजका सल्लाहकार नरहरि न्यौपानेले शुभकामना मन्तव्य दिँदै आफू समाजका लागि सकेको सहयोग गर्ने बताएका थिए । त्यस्तै समाजका निवर्तमान अध्यक्ष सुमन पण्डितले मन्तव्य दिँदै गोरखा सांस्कृतिक समाज एउटा नमूना संस्था बनिरहेको हुँदा अझै गतिविधि बढाउनुपर्ने बताएका थिए ।
संस्थाले सभाको अवसरमा कार्यसमितिबाट संस्थाप्रति गरिएको कामको मूल्यांकन गर्दै सविता पोखरेललाई ‘उत्कृष्ट सदस्य’ घोषित गर्दै सम्मान गरेको थियो । सोहि अवसरमा महिला संयोजक सुस्मिता सापकोटा र समाजका उपाध्यक्ष समेत रहेका सांस्कृतिक कार्यक्रम संयोजक प्रेम अर्याललाई कदर पत्र प्रदान गरिएको थियो ।
राजधानीको नयाँबजारस्थित सगुन क्याफेमा आयोजित समाजको नवौं साधारण सभामा संस्थाको कल्याणकारी कोषको घोषणा समेत गरिएको थियो ।
कार्यक्रमलाई सांस्कृतिक समाजका कार्यबहाक महासचिव टेक गुरुङले संचालन गरेका थिए ।