काठमाडौं । गायिका सोना अमात्य र विवेक सिंह ठकुरीको स्वरमा नयाँ गीत ‘सोच बेलैमा’ बजारमा आएको छ । ‘सोच बेलैमा’ बोलको गीतलाई शशी विक्रम थापाले संगीत तथा शब्द सिर्जना गरेका हुन् । क्यूएस सिनेमा हलमा एक कार्यक्रमको आयोजना गर्दै गायिका अमात्यले उक्त गीतको भिडियो सार्वजनिक गरेकी हुन् ।

Shut up and Dance to the beat भन्ने स्लोगनका साथ ‘सोच बेलैमा’ गीतको म्यूजिक भिडियो सार्वजनिक गरिएको थियो । मिडियाकर्मीहरुको उपस्थितिमा यस गीत बजारमा आएको थियो । एड एजेन्सी फुल सर्कलकी सीईओ समेत रहेकी सोनाले ‘मेरो माया’ एल्बम अन्तर्गतको सिङ्गल ट्रयाक सार्वजनिक गरेकी हुन् ।

उनले आउँदो दिनमा एल्बमभित्रका गीतहरु सार्वजनिक गर्दै जाने र पछि एल्बममा संग्रहित गरेर बजारमा ल्याउने योजनामा रहेको समेत बताएकी थिइन् । सानै उमेरदेखि गीत संगीतमामोहित रहेकी गायिका सोना अमात्यको ‘सोच बेलैमा’ गीतमा पहिलोपटक आरजे भिजे एवं नायक विवेक सिंह ठकुरीले आफ्नो स्वर दिएका छन् ।

यस गीतको म्यूजिक भिडियोमा सोना अमात्य, विवेक सिंह ठकुरी, गरिमा शर्मा र गोविन्द सिंह विष्टको अभिनय रहेको छ । गम्भीर विस्टद्वारा निर्देशित उक्त भिडियोमा सरेन बसेलको कोरियोग्राफी रहेको छ भने नवराज उप्रेतीको छायाँकन रहेको छ । भिडियोको सम्पादन तथा कलरिङ नवीन निरौलाले गरेका छन् । गीत बजारमा आएको एकदिनमै १० लाखभ्यूवर्स बनाउन सफल भएको उक्त गीतको म्यूजिक भिडियोलाई सोना अमात्य यूट्यूब च्यानलबाट सार्वजनिक गरिएको छ ।

कार्यक्रममा उनको अघिल्लो गीत ‘मेरो माया करोडमा’ गीतको टिकटकका प्रतियोगिताहरुलाई पुरस्कार वितरण गरिएको थियो । उक्त टिकटक प्रतियोगिताको प्रथम पुरस्कार मोडल स्मारिका ढकालले जितेकी थिइन् भने दोस्रो पुरस्कार ट्वीनी गर्ल प्रिन्सी एण्ड प्रिज्माले जितेका थिए ।