‘मेरो मनमा बस, मुटुमा बस
तिम्रो न्यानो अङगालोमा चोखो मायाले कस’

सामाजिक अभियान्ता एवं गीतकार प्रकाशपुञ्जको रचनामा तयार भएको गीत बेलायत स्थित लण्डनको साउथ हल स्टुडियोमा रेकर्डिङ गरिएको छ । लामो समयदेखि लण्डनमा बसेर नेपाली गीत–संगीतको श्रीविकासमा लागेकी चर्चित गायिका सर्मिला बर्देवाले स्वर दिएकी छन् । हाल सांगीतिक यात्राको क्रममा गायक आन्नद कार्कीसँगै लण्डनमा रहेका संगीतकार शिखर सन्तोषले संगीत दिएका छन् भने किरण कँडेलको संगीत संयोजन रहेको छ ।

गायिका बर्देवाका साथमा गायक सपन राईले पनि स्वर साथ दिएका छन् । गीतको रेकर्डिङको क्रममा बेलायतमै रहेका बरिष्ठ गीतकार डा. भोला रिजाल तथा डा. कपिल रिजालको पनि उपस्थिति रहेको संगीतकार सन्तोषले जानकारी दिए । कुलजित भामरले रेकर्डिष्टको जिम्मेवारी निभाएको गीतको छायाँकन गर्ने तयारी भईरहेको छ । गीतको शब्द तथा संगीत उत्कृष्ट र फरक धारको भएकाले आफूले स्वर दिएको गायिका शर्मिला बर्देबाले जानकारी दिईन् ।