काठमाडौं । संगीतकार शुभबहादुर सुनाम र गायिका तीर्थकुमारीलाई ‘भक्तराज आचार्य राष्ट्रिय संगीत सम्मान २०७८’ प्रदान गरिएको छ ।

भजन शिरोमणि भक्तराज आचार्यको सम्मानमा स्थापना गरिएको पुरस्कारसँगै दुवै जनालाई ५० हजार १ रुपैयाँ नगद समेत प्रदान गरियो । भक्तराज पत्नीको नामबाट नामाकरण गरिएको ‘सुशीला आचार्य स्वास्थ्य कामना सम्मान’बाट वाद्यवाधक रुपेश सिंहलाई नगद २५ हजार १ रुपैयाँ प्रदान गरियो ।

स्वास्थ्योपचार आवश्यक पर्ने कलाकारलाई दृष्टिगत गर्दै यस वर्षदेखि नयाँ सम्मान पनि थप गरिएको हो । आयोजित कार्यक्रममा शुभबहादुरले ‘जहाँ छन् बुद्धका आँखा’ गीतमाथि सेक्सोफोन बजाएका थिए ।

गायिका तीर्थकी छोरा सुरज थापाले ‘म त खाँदिन कुवाको पानी’ गीति प्रस्तुति दिए । विपिन सागरले भक्तराजकै गीत ‘मुटु जलिरहेछ’ गाएका थिए ।
वाद्यवादक रुपेश सिंहलाई पनि सम्मान गरिएको छ ।

भजन शिरोमणि भक्तराज आचार्यको नाममा यो सम्मान प्रदान गरिएको हो । आचार्य करिब तीन दशकबाट जिव्रोको क्यान्सरका कारण गाउन सक्तैनन् ।

उनका छोराहरु सत्यराज आचार्य र स्वरुपराज २९ वर्षदेखि नेपाली सुगम संगीतमा क्रियाशील छन् ।