काठमाडौं । गीतकार नवि अधिकारी सामाजिक रुपान्तरणमा सिर्जनाका धनी व्यक्ति हुन् । सिर्जनाको मूल गर्भ भनेकै गीतकार मानिन्छ । त्यही गर्भबाट सिर्जना जन्मिन्छ र समाजको प्रतिविम्वभित्र ती सिर्जनाहरु सदाबहार बन्न पुग्छन् । अमर सिर्जनाको धनी गीतकार डा.नवि अधिकारी ‘टाकिन्द्र’ यतिबेला ‘देश छोड्नेको लर्को’मार्फत् अडियो भिडियो सहित सार्वजनिक भएका छन् । हुन त २०७९ माघ २० गते अर्थात् फेब्रुअरी ७ मा डा.नवि अधिकारीको सामाजिक सञ्जाल फेसबुकमा पोस्ट भएको थियो ‘देश छोड्नेको लर्को’ । त्यहीबेलादेखि मनभित्र खुल्दुली थियो समाज बोलेको सिर्जना अब अडियो भिडियो मार्फत् आउँदा देश छोड्नेहरुको मन मनमा बिझ्न पुग्छ भन्ने । यतिबेला देख्दा सामान्य तर गहकिलो रुपमा स्टुडियो भर्सनबाट भिडियो निर्माण गरी बजारमा आएको छ । भिडियोलाई वल्र्डकभर मिडियाको यूट्यूबबाट सार्वजनिक गरिएको हो ।

हिजो उड्यो छिमेकी भाइ, आज आफ्नै घरको
यस्तै भा’छ देशको हालत देश छोड्नेको लर्को

नौनी जस्तै नेपाली मन बनाउँदै पत्थरको
हिजो उड्यो जेठो बाठो, आज उड्यो अर्को
यस्तै छ यो देशको हालत देश छोड्नेको लर्को

उल्लेखित शब्दहरुभित्र एउटा सिङ्गो देश छ । हामी विभिन्न बहनामा देश छोड्दैछौं । कहिले अध्ययनको नाम लिएर, कहिले विभिन्न सेमिनारको नाम लिएर, कहिले देशको द्वन्द्वलाई लिएर त कहिले वैदेशिक रोजगारीको नाम लिएर देश छोडिरहनेको लर्को बढिरहेको छ । हिजो कृषिप्रधान देश थियो तर आज देशलाई गाली गर्दै छोड्नेहरुको देश छ । आफ्नो देशमा रहेर आफ्नो बारी खन्नुभन्दा विदेशमा सामान्य नोकरी गरेर डलरमा हिसाब गर्ने बानीले विदेशको गल्लीहरुमा नेपालीहरु किस्ताबन्दीमा जिन्दगी चलाइरहेको अवस्था छ । जो सभ्रान्त भनिने देशहरुमा गएका छन् तिनीहरुको जिन्दगी असहज छ तर देश फर्कने भन्दा पनि १८ घन्टे कामले थला परेको जिन्दगीमा खुशी खोजिरहेका छन् । यो देश छोडेर जानेहरुमध्ये खाडी भित्रएकाहरुले देशको रेमिट्यान्सबाट देश धानिरहेको र देश फर्किएर घरपरिवारसँग बसेका छन् ।

यही अवस्थाको एउटा प्रतिविम्वभित्रको गीत सिर्जना गरेका हुन् डा.नवि अधिकारीले । गाउँका सबै बारीहरु जंगल बनाउँदै, बुढाभएका बाआमाहरुलाई घरमा छाडेर शहरमुखी भएको समाजले विदेशमुखी भएर बाँचेको छ भन्ने सन्देश हो यो गीत । डा.नवि अधिकारीका प्राय सिर्जनाभित्र नेपाली साहित्यको गहिरो व्याख्य देखिन्छ । शब्द शील्पमा प्रयोग गरिएका सिर्जनाहरुले देश र समाजको वास्तविकतालाई गहकिलो रुपमा ब्याख्या गरिरहेको पाइन्छ ।

‘देश छोड्नेको लर्को’ डा.नवि अधिकारीको आएसँगै अर्को गीत पनि त्यही नामबाट आएका छ । पत्रकार रतन देवकोटोका शब्दमा आएको त्यो गीतको हुक लाइन पनि ‘देश छोड्नेको लर्को’ नै रहेको छ । एउटा लाइन हुबहु मिल्नु पनि सिर्जनाका हिसाबले प्रतिलिपि अधिकारभित्र बहसको विषय बन्न जरुरी देखिन्छ । शब्दका भाव मिल्न सक्नु फरक हो तर लाइन पुरै मिल्नुमा सामाजिक सञ्जालमा पहिला भएको पोस्टको प्रभाव हो कि भन्ने प्रष्ट हुन्छ । दुई सर्जकको भाव मिल्नु देशप्रतिको माया र समाजको यथार्थता होला तर पुरै लाइन मिल्दा यसको बारेमा दुबै स्रष्टाहरुको सिर्जना गर्भको समय र सामाजिक सञ्जालमा भएको पोस्टको आधारमा सच्याउनु जरुरी देखिन्छ ।