![](https://musickhabar.com/wp-content/uploads/DNA-announcement-poster-300x150.jpeg)
काठमाडौं, ७ जेठ। गायक प्रमोद खरेल यतिखेर क्यानडातिर हंगामा मच्चाउँदैछन् । एक महिने क्यानडाको सांगीतिक यात्रामा होमिएका खरेलले बुद्ध जयन्तीको अवसर पारेर क्यानडामा आयोजना गरिएको हामी नेपाली कार्यक्रममा हंगामा मच्चाएका हुन् । आफ्नो एकल सांगीतिक यात्राको अवसरमा उनले क्यानडाको विभिन्न कार्यक्रमहरुमा आफ्नो प्रस्तुति दिँदै आइरहेका छन् ।
हामी नेपाली नामक सांगीतिक कार्यक्रममा खरेलले हंगामा भो, मेरो दिल छ पोखरामा, डुबायो पापी मायाले, उसले जति माया, कन्ट्रोल भएन लगायतका एक दर्जनभन्दा बढी गीतहरु प्रस्तुत गरेका थिए । जुन १ तारिखका दिन कार्यक्रम सकेर नेपाल फर्कने सोचमा रहेका खरेलले उक्त कार्यक्रममा स्टेजबाट गीत गाउँदागाउँदै दर्शकहरुको भीडमा ओर्लिएर पनि सँगसँगै गीत गाएका थिए । बाक्लो दर्शकको भीडलाई उनका गीतले नचाउने हँसाउने मात्र भएन की वान्स मोर वान्स मोर भन्दै अझ गीत गाउन हौसला प्रदान गरेपछि उनले कुनै गीतहरु त फेरी गाउनु परेको थियो । आफ्नो नेपालीपन झल्काउने राष्ट्रिय गीत पनि स्टेजमा गाएर दर्शकहरुलाई नेपाल सम्झाउन पुगेका गायक खरेलले राष्ट्रिय झन्डाको साथमा स्टेजमा आफ्नो प्रस्तुति दिइरहेका थिए । गायक प्रमोद खरेलको साथमा बुद्धिसागर बस्यालको पनि प्रस्तुति रहेको थियो ।