चैत २८, काठमाण्डौ । लोक गायिका चन्द्रकला शाहलाई लाइफटाइम अचिभमेन्ट अवार्डसहित पाँचौं राष्ट्रिय राप्ती म्यूजिक अवार्ड आज सम्पन्न हुँदैछ । राष्ट्रिय नाचघर जमलमा सम्पन्न हुने यस कार्यक्रममा राप्तीबाट सरकारमा रहेका मन्त्रीहरुसहित वरिष्ठ संगीतकर्मीहरुको उपस्थिति रहने आयोजक संस्थाका अध्यक्ष शशि शर्मा मजगैंयाले बताएका छन् । मौलिक झाँकी र नौमती बाजसहित १२ः१५ बजेबाट रेड कार्पेट गरिने यस अवार्डमा अतिथि सत्कारसहित २ बजेबाट भने विभिन्न रेडियो, अनलाईन र एनटीभी प्लसबाट प्रत्यक्ष प्रसारण गरिने बताइएको छ ।

अवार्डमा प्रमुख अतिथि उपप्रधान तथा अर्थ मन्त्री कृष्णबहादुर महरा, सिंचाई मन्त्री दीपक गिरि, यूवा तथा खेलकुद मन्त्री दलजित श्रीपाली लगायत माननीय सांसद लगायत विभिन्न उच्च पदस्थ व्यक्तित्वको उपस्थिति रहने बताइएको छ ।

कार्यक्रमलाई तीन चरणमा विभाजन गर्दै मनोरञ्जनात्मक बनाउने आयोजक रापती समाजले बताएको छ । संस्थाका महासचिव प्रवीणकुमार रेग्मी, अध्यक्ष शशि शर्मा मजगैंया र गायिका जुनु रिजाल, समाजका सदस्य पी.एन. सापकोटा र गायिका प्रीती आलेले कार्यक्रमलाई संचालन गर्ने भएका छन् । कार्यक्रममा गीतसंगीतका विभिन्न गायक गायिकाको प्रस्तुतिसहित झाकी,चर्चित कलाकारको नृत्य र हास्यव्यंग्य रहने बताइएको छ । अवार्डमा विभिन्न ३२ विधामा उत्कृष्ट पाँचभित्र मनोनयनमा परेका स्रष्टा र सिर्जनाबाट उत्कृष्ट एकले अवार्ड चुम्नेछन् ।