• विजयबाबु स्मृति पत्रकारिता पुरस्कार गोकर्ण गौतमलाई

    म्यूजिक खवर
    प्रकाशित: २५ मंसिर २०७७, बिहीबार

    काठमाडौँ। विजयबाबु स्मृति पत्रकारिता पुरस्कार २०७७ स्व.पत्रकार गोकर्ण गौतमलाई मरणोपरान्त प्रदान गरिएको छ। न्युज कारोबार डटकमको चौथो वार्षिकोत्सवको अवसरमा बुधबार नेपाल समाचार केन्द्र प्रालिका अध्यक्ष लक्ष्मी श्रेष्ठ खत्रीले दिवंगत पत्रकार गौतमकी धर्मपत्नी सिर्जना तुलाधर गौतमलाई पुरस्कार हस्तान्तरण गरेकी हुन्।

    पुरस्कार हस्तान्तरण गर्दै अध्यक्ष श्रेष्ठले युवा पत्रकार गौतमको निधनले नेपाली पत्रकारिता क्षेत्रले अपुरणीय क्षति व्यहोरेको बताइन्। सत्य, तथ्य र निष्पक्ष पत्रकारिताको यात्रामा अघि बढ्दै गर्दा असामयिक निधन भएका पत्रकार गोकर्ण गौतम नेपाली प्रेस जगतमा अविष्मरणीय रहनेछन्, उनले भनिन्, ‘उनको स्वच्छ पत्रकारिता सम्पूर्ण नेपाली पत्रकारका लागि अनुकरणीय रहनेछ।’

    नेपाल पत्रकार महासंघका अध्यक्ष गोविन्द आचार्यको संयोजकत्वमा गठित छनोट समितिले मंसिर १२ गते स्व. पत्रकार गौतमलाई दोस्रो विजयबाबुखत्रीस्मृति पत्रकारिता पुरस्कार प्रदान गर्ने निर्णय गरेको थियो । समितिमा प्रेस काउन्सिल सदस्य संगीता खड्का र नेपाल समाचार केन्द्रद्वारा प्रकाशित अनलाइन पत्रिका न्युज कारोबारका सम्पादक डीआर आचार्य सदस्य थिए।

    २०७५ मंसिर १२ गते अक्षय कोष स्थापना गरी घोषणा गरिएको पुरस्कारको राशि ३४ हजार रुपैयाँ छ । मकवानपुरको छतिवन घर भएका पत्रकार गौतमको ३१ वर्षको उमेरमा मंसिर ४ गते निधन भएको हो । मस्तिष्कको नसामा समस्या देखिएपछि शल्यक्रियाका क्रममा उनको निधन भएको थियो।

    देशान्तरबाट पत्रकारिता पत्रकारिता सुरु गरेका गौतम २०७० सालदेखि पाँच वर्ष कान्तिपुर पब्लिकेसन्सद्वारा प्रकाशित नेपाल म्यागेजिनमा र त्यसयता कान्तिपुर दैनिकमा आबद्ध थिए । विजयबाबु स्मृति पत्रकारिता पुरस्कार २०७६ वरिष्ठ पत्रकार ध्रुवहरि अधिकारीलाई प्रदान गरिएको थियो ।

    फेसबुक प्रतिक्रिया
    सम्बन्धित शीर्षकहरु